ဧည့်ခံတန်ဆောင်း

၁၉၈၅ ခုနှစ်တွင် ပန်းဆွဲအမှတ်(၁၆)ကို ပုံတူပြု၍ ဘုရားဖူးများ အနီးကပ်လေ့လာကြည်ညိုနိုင်စေရန် ပြုလုပ်တပ်ဆင်ခြင်းကြောင့် ရွှေပန်းဆွဲကြီးတန်ဆောင်းဟု ခေါ်တွင်ခဲ့ဖူးသည်။ ထို့နောက် ဂျပန်မတ်ရပ်ဘုရားကို ထိုတန်ဆောင်း၌ ပူဇော်ခံခဲ့သောကြောင့် ဂျပန်တန်ဆောင်းဟု ခေါ်တွင်ပြန်သည်။ ထိုတန်ဆောင်း၏ တိုင်များမှာ သံတိုင်များဖြစ်ပြီး ၁၉၀၃ခုနှစ်ဟု ရေးထိုးထားသည်။ ၁၉၆၉ ခုနှစ်တွင် ဦးကြည်အိန်+ဒေါ်သန်းမိသားစုတို့က မွမ်းမံခဲ့ကြောင်း ကမ္ပည်းအရ သိရှိရသည်။ ၂၀၀၁ခုနှစ်တွင် ဦးစံချိန်တန်ဆောင်း မွမ်းမံခြင်းနှင့်အတူ ထိုတန်ဆောင်းမှ အမိုးများ၊ သွပ်ပန်းတဉ်းများ၊ အခင်းများ၊ လက်ရန်းများ ပြုပြင်ခြင်းများ ဆောင်ရွက်ခဲ့သည်။ ဧည်သည်တော်များအား ထိုတန်ဆောင်း၌ ဧည့်ခံသောကြောင့် ဧည့်ခံတန်ဆောင်းဟု အမည်တွင်သည်။ ၂၀၀၆- ၂၀၀၇ ခုနှစ်တွင် ထိုတန်ဆောင်းနှင့် ဦးစံချိန်တန်ဆောင်းကို တစ်စပ်တည်းဖြစ်အောင် မွမ်းမံသည်။ အမိုးပြာဿဒ်တွင် ဘင်္ဂလီပြာဿဒ်ပုံမှ စံပယ်ထပ်ပုံ ပြောင်းခဲ့သည်။ ဒုတိယဗိုလ်ချုပ်ကြီး ခင်မောင်သန်း မိသားစုက ငွေကျပ် (၂၀၀)သိန်းကျော် လှူဒါန်းပြီး မွမ်းမံသူအလှူရှင် ကမ္ပည်းတင်ခဲ့သည်။ တန်ဆောင်းကြီးမှာ အလျား ၅၁ ပေ၊ အနံ ၃၅ ပေခန့် ကျယ်ဝန်းပါသည်။